O venres 11/01/2019, publicouse no DOG unha resolución da D.X. de Gandaría, Agricultura e Industrias Agroalimentarias pola que se declarou a presenza de 5 novos positivos do nematodo do piñeiro.
Esta resolución amplía a zona demarcada (ZD) (mapa) declarada previamente, afectando a un total de 25 concellos (relacionados no anexo II da resolución) e estendendo a esta área as medidas ou restricións preexistentes para a comercilización de piñeiro que afectaban á actividade dos serradoiros e rematantes. Os novos concellos afectados na súa totalidade son: Baiona, Gondomar, Guarda (A), Nigrán, Oia, Rosal (O) e Tomiño. Ademais, en Vigo aumentan o número de parroquias incluídas e Tui, que tiña algunhas parroquias afectadas, pasa a estalo na súa totalidade.
Como consecuencia, establecéronse as seguintes medidas de erradicación:
- Establecer unha zona de de corta obrigatoria: área de 100 m arredor de cada unha das árbores positivas onde se erradicarán tódalas especies sensibles (piñeiros), sanas ou sintomáticas. O anexo III da resolución, relaciona as parcelas afectadas. O permiso de corta débese solicitar nun prazo de 10 días a partir de hoxe. As cortas deberán estar executadas antes do día 1 de abril de 2019. En caso contrario a Administración procederá a executalas de forma subsidiaria.
- Os propietarios ou administración implicadas terán a obriga de eliminar tódalas árbores sintomáticas, decaídas ou afectadas por incendios forestais ou tormentas na franxa demarcada, de xeito inmediato se as árbores aparecen do 1 de abril ao 30 de outubro e antes do día 1 de abril se aparecen fora dese período.
As condicións para o traslado de madeira e cortiza sensible (excepto as embalaxes) son as seguintes:
- Ser sometida a tratamento térmico axeitado nunha instalación de tratamento autorizada, onde acada unha temperatura mínima de 56ºC durante ao menos 30 minutos por toda a madeira e a cortiza, garantindo que están libres de NMP vivos e de vectores vivos.
- Ir acompañados de pasaporte fitosanitario
- Ser trasladados fora da época de voo do vector ou, salvo no caso de madeira totalmente descortizada, que teña unha capa protectora que garanta a imposibilidade de infestación polo NMP ou o seu vector á instalación de tratamento autorizada á menor distancia da Zona Demarcada.
Estes traslados serán obxecto de control periódico in sito polas autoridades competentes.
A madeira en forma de material de embalaxe poderá ser trasladada se cumpre coa norma NIMF-15 e leva as marcas correspondentes.
Tódolos serradoiros e industrias da madeira existentes na ZD deben estar rexistrados e autorizados, se queren sacar madeira da ZD. No caso das embalaxes as empresas deben estar rexistradas e autorizadas para colocar a marca NIMF 15 antes de sair da zona demarcada.
Comentarios recientes